Que non sobren as sobras

Nestas datas, que non sobren
as sobras!

Porque o Entroido tamén se saborea ao día seguinte.
Descubre receitas de aproveitamento sinxelas e deliciosas para seguir gozando da cociña sen desperdiciar nada.

Roupa vella de cocido

Ingredientes

· 350 g de carne de cocido variada esmiuzada (polo, costela, lacón...)
· 200 g de hortalizas (cenoria, repolo, pataca, etc.) picadas
· 200 g de garavanzos do cocido
· 1 cebola grande
· 60 ml de aceite de oliva virxe extra
· 2 dentes de allo
· 1 culleradiña de pemento doce ou picante
· Un pouco de comiño
· 3 ou 4 tomates grandes triturados
· Unhas pingas de viño branco
· Sal ao gusto

Pasos

Desosamos toda a carne e esmiuzámola. Picamos as hortalizas e reservamos.

Picamos a cebola e o allo e sofritímolos a lume baixo, ata que se poñan transparentes. Incorporámoslle á mestura o comiño e o pemento, e deixámolos outro pouquiño.

Trituramos o tomate e pasámolo por un pasador de puré. Engadímolo ao rustrido de cebola e reducimos o líquido ata que espese.

Agregamos todas as carnes, garavanzos e hortalizas reservadas e dámoslle un fervor cunhas pingas de viño branco. Salpementamos ao gusto.

Arroz de onte

Ingredientes

· 150-200 g por persoa de restos sólidos do cocido picados, excepto a pataca
· Caldo do cocido
· 500 g de arroz (mellor bomba)
· 2 cebolas pequenas
· Un pouquiño de tomate (opcional)
· Aceite

Pasos

Picamos a cebola e refogámola cun pouco de aceite no recipiente no que cociñaremos o arroz ata que estea dourada, momento no que engadimos os restos da carne.

Sofritimos amodiño para que solte a graxa e o sabor para cubrir o do resto dos ingredientes e cociñamos ata ter a carne brandiña. Podemos poñer unhas pingas de tomate para facelo máis suculento.

Continuamos coa verdura e deixamos para o final os garavanzos para que se esmaguen o menos posible e reservámolos ata facer o arroz.

20 minutos antes de comer quentamos o rustrido e refogamos o arroz. Mesturamos ben e engadimos dúas veces e media o seu volume en caldo do cocido, manteremos 5 minutos a lume forte e despois poñerémolo a lume medio.

Deixámolo cocer 20 minutos e repousar 5 máis.

Empanada de cocido

Ingredientes

Masa de empanada:
· 550 g de fariña de trigo e un pouco máis para amasar
· 175 g de aceite de xirasol
· 150 g de leite
· 1 ovo (outro para pintar a masa)
· 10 g de sal
· Sen fermento

Recheo:
· 600 g de restos de carne de cocido
· 2 cebolas grandes
· Sal e pementa negra
· 150 g de grelos cocidos
· Aceite de oliva virxe extra

Pasos

Botamos a fariña nun cunco, engadimos o sal e o resto de ingredientes, e mesturamos ata que ligue. Baleiramos e formamos unha bola, que deixaremos repousar cuberta cun pano durante 30 minutos dentro do cunco.

Mentres, pelamos e picamos as cebolas. Esmigallamos a carne do cocido e quitámoslle o sobrante de graxa. Sofritimos a cebola cunha pinga de aceite e un chisco de sal.

Engadimos a carne e deixámola amornar. Poñemos os grelos, tapamos a tixola e deixamos que se fagan durante un minuto.

Mesturamos todo o recheo, rectificamos de sal e escorremos ben cun coador ou escoadoiro para que elimine o exceso de líquido. Ese mesmo líquido podemos utilizalo na masa da empanada. Deixámolo arrefriar.

Dividimos a masa en dúas partes deixando unha para cubrir máis tarde. A máis grande a usaremos como base, a estiramos e colocamos sobre un molde forrado de papel de enfornar.

Distribuímos o recheo sobre a masa e tapamos coa masa restante. Decoramos cos recortes, facemos un oco no centro e pintamos con ovo batido. Enfornar a 200 ºC durante 45 minutos ou ata que a vexamos tostadiña. Deixámola arrefriar sobre unha reixa antes de servir.

Carne de cocido en fritada con ovo escalfado

Ingredientes

· 2 dentes de allo
· 2 cebolas medianas
· 1 pemento verde
· 1 pemento vermello
· 200 g de tomate triturado
· Aceite
· Sal
· Carne de cocido
· 4 ovos

Pasos

Picamos os dentes de allo, a cebola e os pementos e facémolos un pouquiño nunha tixola con 4 culleradas de aceite de oliva.

A continuación botamos o resto de verduras e un chisco de sal. Témolo a lume medio durante uns 15 minutos ata que todo estea brandiño. Engadímoslle o tomate, mesturamos e deixamos outro pouco.

Agora poñemos a carne do cocido, mesturamos un pouco e poñémoslle os ovos para que se escalfen. Tapamos e deixamos cociñar ata que as claras dos ovos se poñan branquiñas.

Filloas recheas de cocido e queixo de Arzúa

Ingredientes

· 4 filloas
· Carne de cocido
· Queixo de Arzúa Ulloa
· Verdura do cocido

Pasos

Esmigallamos a carne do cocido e apartamos a verdura.

Poñemos unha filloa nun prato e enchemos coa carne e a verdura moi ben escorrida. Enrolamos e colocamos nunha fonte para forno.

Poñemos unhas tiras de queixo de Arzúa-Ulloa enriba e metemos no forno uns 8-10 minutos a 180 ºC.

Albóndegas de cocido en salsa de tomate

Ingredientes

· Carne sobrante do cocido
· 1 pemento
· 1 allo
· 1 cebola
· Perexil
· Sal e pementa
· 500 g bechamel
· 500 g salsa de tomate

Pasos

Esmigallamos a carne do cocido. É moi recomendábel engadir machucadas as verduras tamén. Poñemos na mesturadora ou remexemos á man, se queremos notar os anaquiños.

Xuntamos a bechamel e a carne do cocido. Salpementamos. Se queda moi líquido e pouco manexable podemos quentar a lume lento para perder ese exceso de caldo. Deixamos arrefriar tapado con papel filme transparente, mellor dun día para outro.

Facemos pelotiñas e pasámolas por fariña. Fritímolas en aceite moi quente e cando estean lixeiramente tostadas apartámolas.

No mesmo aceite sofritimos tamén a lume medio o pemento, a cebola e o allo ao redor de 5 minutos. Engadimos o tomate e o perexil picado moi fino. Sofritimos outros 5 minutos e metemos as albóndegas na salsa.

Rolos lacón con San Simón

Ingredientes

· 1 paquete de masa filo
· Lacón
· Queixo San Simón

Pasos

Picamos os tacos de lacón e o queixo San Simón e mesturámolos nun cunco. Partimos pola metade todas as follas da masa filo.

Quentamos o forno a 180 °C e poñemos unha cullerada en cada unha das follas de masa filo. Pechámolas coma un sobre e cun pouco de auga selámolas. Metémolas no forno ao redor de 20 minutos ata que estean tostadiñas.

Patacas recheas de lacón con grelos

Ingredientes

· 8 patacas medianas
· Sobras do lacón e dos grelos
· 200 g de queixo Arzúa-Ulloa relado
· Pemento doce ou picante
· Salpementar

Pasos

Lavamos as patacas e cocémolas en abundante auga con sal.

Esmigallamos o lacón, picamos os grelos en anaquiños e mesturámolos con dúas culleradas de queixo relado. Reservamos.

Pelamos e baleiramos as patacas e reenchémolas co lacón con grelos.

Repartimos o queixo sobre as patacas e gratinámolo no forno, que teremos quente a 200 ºC. Cando o queixo comece a dourarse, retiramos as patacas do forno, esparexemos cun pouco de pemento e listo!

Ensalada rusa de lacón e pexego

Ingredientes

· Sobras do lacón
· Maionesa
· Atún (opcional)
· Cenorias, patacas, pexegos e chícharos (ao redor do dobre do lacón)

Pasos

Cortamos o lacón en anaquiños pequenos.

Picamos en cadradiños e cocemos todas as verduras. Deixamos arrefriar e engadimos o atún, o lacón, a maionesa e mesturamos. Decoramos ao gusto.

Follado de lacón con queixo do Cebreiro

Ingredientes

· Sobras do lacón
· 2 láminas de follado
· 100 g de tomate frito
· 50 g de marmelo caseiro
· Queixo do Cebreiro
· Ourego
· 1 ovo de curral (para pintar)

Pasos

Quentamos o tomate e agregamos o marmelo cortado en cadradiños. Remexemos ben e deixamos arrefriar.

Quentamos o forno a 200 ºC. Estiramos unha lámina de follado coa axuda dun rodete e poñémolo sobre papel de enfornar.

Botamos o rustrido de tomate e marmelo e por riba o lacón, o queixo en anaquiños e o ourego. Salpementamos ao gusto.

Tapamos coa outra lámina pinchada cun garfo para que non inche e pechamos polos bordes. Pintamos co ovo batido e metémolo no forno ata que estea tostadiño.

Lasaña de lacón con grelos

Ingredientes

· 500 g de lacón cocido
· 500 g de grelos
· 1 tomate grande
· 1 cebola mediana
· 1 bote de tomate
· 1 paquete de placas de lasaña precocidas
· 1 litro de caldo de cocido
· 100 g de queixo relado para gratinar
· Unha cullerada sopeira de manteiga
· 100 g de fariña de trigo
· 200 g de nata líquida para cociñar
· Aceite de oliva virxe extra
· Sal e pementa

Pasos

Poñemos o caldo a quentar e cando comece a ferver separámolo do lume e mergullamos nel as placas de lasaña, ata que se hidraten.

Picamos a cebola e o tomate pelado en pequenos dados e poñémolos a rustrir nunha tixola con aceite de oliva.

Engadimos agora o lacón esmiuzado e os grelos ben picados e escorridos. Mesturamos ben os ingredientes, salpementamos ao gusto e deixamos que se fagan 5 minutos. Incorporamos o bote de tomate, engadimos un vaso de caldo e seguimos cociñando 10 minutos máis.

Preparación salsa velouté: Fundimos a manteiga nunha tixola, engadimos a fariña e remexemos sen pausa para que se vaian mesturando. Incorporamos a nata e seguimos remexendo. Tamén poñemos un vaso de caldo coado e mesturamos ata que quede unha cremiña homoxénea.

Vertemos unha fina capa de velouté no fondo do molde, unha capa de placas e outra de rustrido. Repetimos rustrido e velouté ata rematalo.

Espallamos o queixo relado e metémolo no forno a 200 ºC durante 20 minutos.

Bolos de vento de lacón e queixo de tetilla

Ingredientes

· Lacón do cocido
· 65 g de queixo de tetilla
· 130 ml de auga
· 40 g piñóns
· 35 g de manteiga sen sal
· 75 g de fariña
· 1 ovo e 1 xema
· Sal e pementa
· Aceite de oliva virxe extra

Pasos

Picamos o queixo e o lacón en cadradiños pequenos. Tamén os piñóns e reservamos.

Para preparar a masa poñemos a auga, a manteiga e un chisco de sal nun cazo e quentámolo ao lume. Cando a auga ferva, retirámolo do lume, engadimos a fariña e remexemos.

Á masa engádeselle o lacón, o queixo, os piñóns, o ovo e a xema. Salpementamos. Remexemos ata conseguir unha mestura homoxénea.

Facemos os boliños e fritímolos con abundante aceite.